ꦏꦶꦢꦸꦁꦩꦺꦫꦁꦫꦒ꧉
— ꦫꦶꦪꦺꦴꦥꦿꦩ꧀ꦧꦤꦤ꧀꧉
Durma
| amiwiti amungkasi kang pepuncak bungkah sarining tepi ngracut kang gumelar sakala myang niskala nyigeg osiking pangrasi esthining raga gya musna pan aliring |
Dhandanggula
| sira dewi, kusumaning ati sasat wengi kang ngupadi rina lir samodra sung ombake tulusing katresnanku datan samudana duh yayi janji prapteng delahan nimas kang satuhu sumilak kang mega-mega prasetyaku saksi bumi lawan langit ya mung sira ri nimas. |
Sinom
| Satata lenggah sang tapa, Patrap bhirawa pan sakti, Anyandhak iga wekasan, Trajumas kacadhak kering, Amung kari samiri, Jumeglug swaraning kalbu, Ohm Hong prayogantara, Miwiti hangesthi Gusti, Sinigeg unjaling bajraherawana. | ||
| Sun puja sarining candra, Sun puja sarining tari, Sun puja sarining surya, Sun puja sarining angin, Puja sarining agni, Muja sidhi bantalaku, Muja sarining warih, Nagabandha kang ngupengi, Ingkang nyangga Sanghyang Naga Antaboga. | ||
| Hyang Basuki kang hanyakra, wesi dladag sendhen mami, wot ogal-agil kang lamak, Sun puji sarining Bumi, Mustika ingarani, Ardi Harjuna satuhu, Awit kersaning Hyang Widhi, Ingkang jumeneng tengahing caksu ingwang. | ||
| Asingep sarining mega, Teken jangeting kang teja, Langgeng Gusti laku hamba, Rahayu kang tinemoni, Jangkep dene amuji, Mustika sarining manu, Manusa satuhunya, Asikep sipating Widhi, Merang raga Sang wibatsyuh megat suksma. | ||
| sang wiku raga minulya awya tambuh lawan mami sakadang kang tanpa pegat angiring sacipta rahsi punapa tuhu sisip sinendhal kabirat ngramu kajarwia kang cipta lamun silih luput reki bebendu cinadhang reridu habapang. | ||
| Yayah bermara manguswa puspita banjaran sari laku sonya merang arga tetugur hanjedi diri nyigeg genturing kapti mekasi kang nunggal bayu rinacut rinengga suksma ya ingwang dalang sejati hulun Om Awighnam Astu Namo Sidhham |
Megatruh
| Anut lakuning kumara den kawuwus, Pegating rasa pangrasi, Lawan wadhag kang satuhu, Siyaking cipta lawan sir, Amung pangangen talinya. | ||
| Ingsung kumara ing jagad pangrantiku, Saderma mulat ing nguni, Mosiking harda kang semu, Sedya nduwa karsa jati, Pesthi ingkang wus kinodrat. | ||
| Pami yekti sisip dene sun lelaku, Sapa gene kang miwiti, Ngrakit wijining sang nepsu, Yen temen maha ing nguni, Ya gene tan arsa mbirat. | ||
| Nanging sun mung kumara kekandhang tutur, Mligi mapan ing pangeling, Borong yen badhe kawuwus, Badhe diyu apa resi, Apan ingsun mung kumara. | ||
| Parandene sira kang abanda catur, Adol ucap barang uni, Sasat weruh punjul wanuh, Wuwuh sabarang sinanggit, Cawang pan lidhah lir sarpa. |
Pocung
| Batinku anggung kasengsem, duh pengeran sri Yesus kang satuhu, salam, salim, slamet, myang jagad saisine. | ||
| hya ta sira midangetna, panglocitaku mring Gusti maha luhung, kang asipat lir samodra, amot kamot bebudene. | ||
| nadyan ta karoban narmada sewu, tansah narima apa wae, tuhu tulus pakartine, tangguh tan kengguh sang jaladri. | ||
| Nora obah nora mosik, tansah ngugemi darma saking, Gusti ingkang maha suci, Kang wenang nggelar lan ngukut bumi. | ||
| prasasat sira narmadane Gusti minangka samudrane, Sewu dalan kang sira ambah, Ora wurung mulih mula mulanya. | ||
| Nadyan mung priyangga bali kasucen, Saisining surga kang dadi seksi. parahita ing kalanggengan, nyawiji dadi siji ing prajane pengeran. |